ديوان حكي قرايا الشاعر موسى حافظحكي قرايا موسى حافظ الإهداء إلى اللاهثين وراء رغيف الخبز كبرت العيلة كبرت العيلة وصار الهم بالشيله وصار الخوف يطاردني بكل ليلة ورغيف الخبز بركض ونا بركض ورا منو وطفال ابحضن العقد ع جمر الجوع بستنو الله يا رغيف الخبز! هديت حيلي أبو النبوت أبو النبوت: توفي عن عمر يناهز خمسة وثمانين عاماً، ضرير وحيد دون زوج أو ولد، يسكن غرفة من طين دون إضاءة أو تهوية، وأمام الغرفة نخلة صغيرة، يخرج في الصباح راكباً عربة خشبية، حيث اعتاد أحد العتالين في المخيم اصطحابه معه إلى المدينة كل صباح من أجل التسول، وإعادته إلى بيته قبل المساء. وكثيراً ما كان أطفال المخيم يسرقون الطعام من بيوتهم ويعطوه لأبي النبوت مقابل أن يعطيهم بعض القروش. مات أبو النبوت ولم تكتشف وفاته إلا بعد أن جاء صديقه إلى المدينة فوجده ميتاً... يا عين بلدنا جودي وهيلي الدمع سطرين واذكري رفيق العمر وقولي الدرب من وين ختيار ها هالختيار مالوا نيس وجار بحكي مع الحيطان بلعن بلا الانسان جوات خشة مفسخة بديال نخلة مشلحة عاش القهر قهرين ابو النبوت كبر الجرح وبينك وبين الهم عيش وملح بعمر سنك ما ضحك بعمر قلبك ما فرح ابو النبوت عكازتك هي النظر هي الطريق هي السفر تحت الشمس تحت المطر تمشي معك وترجعك تحكي معها وتسمعك وتعلمت دربك لوين ابو النبوت سلام عليك يوم ولدت سلام عليك يوم تموت وان جاءك الملكان فقل: اني لاجئ والتزم السكوت أبو حشيش أبو حشيش: إنسان حقيقي من لحم ودم عاش في المخيم، وبقي يعتقد لأربعين عاماً أن الزمن قد توقف بعد خروجه من قريته، وأن أغنامه وأبقاره التي اجبر على تركها ما زالت حية ترزق. برنامجه اليومي هو جمع الحشائش من مرج بن عامر وإطعامها للأغنام والأبقار في المخيم دون مقابلـ لم يصد أن حلق لحيته أو بدل ملابسه، وبقي يرفض النوم في وحدات الوكالة، وأخيراً وجدوه ميتاً في زريبة للأبقار بجانب كومة من الحشائش. يخرب بيتك يا أبو حشيش ما بطلع من ريشك ريش قضيت العمر تعبان عشت كديش ومت كديش عايش عمرك يوم بيوم ثلثينو أوجاع وصوم متغلب ما بتعرف نوم عايش يومك ع مفيش صاحي وتحلم في الماضي طالع نازل ع الفاضي وبهموم الدنيا راضي وبهالعمر تخفش تخفيش قضيت العمر بدور تفتل تبرم بين الدور وتبيت بين لقبور وع شبر ميه بطيش بخلقة ثوب وبنطلون كل رقعة ع جنبو لون ولحية بتصحى نابليون صفرا من الخنتريش مش حامل بقلبك هم ومش ع بالك خال وعم ضيعت العمر بالكم[1] ع اللقمة تفتش تفتيش وشو قولك با ابو حشيش يا جماعة قلبي طق رحتو ع الغرب وع الشرق اللي مالو ارض وحق بتنهش لحمه الخفافيش ويعمر بيتك يا ابو حشيش أحسنلك تعيش كديش أنشودة الرعيان يا زيتون يلي مزين ديرتنا خلينا نغني لأهل قريتنا ويا راعي يا بو الناي واليرغول غنيلي ع نغمة زريف الطول (يا زريف الطول سلم ع الحبيب خبره إني على غيابه غريب علتي بالصدر ما إلها طبيب إلا برجوع الأهل ع ديارنا) ونجوم الليل تسهر فوق خيمتنا وتطرب على لمتنا وجمعتنا ويا راعي ميل علينا ميل صبايا الحي بتغني ع لغزيل (يا اغزيل شو سوينا الغربة طالت علينا خبرهم يا راعينا عن قلوب معذبا) حمام يا معشعش بطاقتنا صبرنا كثير بلكي هانت حرقتنا مشينا دروب والجمرة على الجمرة يا راعي عود تا نغني على الجفرة (يا شوفت شفتها بتصيح يا امي سافر حبيب القلب وبعده ابن عمي نذل ما بوخذ نذل لو سيحوا دمعي يحرم علي الفرح ما دمتو عزبيه) وزغاريد فنيهن يا جارتنا ما عدنا نخاف لما نقول كلماتنا يا راعي يا ماشي هونا وهونا أمانة عليك ما شفتلي دلعونا (هاي دلعونا عذبتي قلبي أنا وياك ببلاد الغربة نذرن عليا نذر يا ربي إن عادت دلعونا لهز الكونا) ويا حصاد دير بالك ع غلتنا ع بيدر جود تا تكمل حكايتنا خير كثير وتوكل ع الله وراعي الغنم نغماته على العلا (يا علا القمح بيدر وأنا حصدته بايدي... علا وقضيت العمر أسهر ع أرض أبوي وسيدي... علا) ويا حادي الدار اتحنجل بساحتنا سنين كثار وما اسهرنا بسحجتنا ويا راعي دقلي ع الشبابا سكابا دموعنا من بعد لحبابا (سكابا يا دموع العين سكابا هجرهم حمل لقلبي عذابا سنة وسنتين بستنا الحبايب لحتى تقطعوا أوتار الربابا) ويا راعي بأرض المرج عزبتنا على الله تعود وتتجمع عشيرتنا ويا راعي سرج وفوق لتلال تغنيلك يا حلالي يا مالي (راعي الغنم خلي الجبل يرقص ع نغمات الحنين يا حلالي يا مالي خلي الأمل يبني أمل يمحي لعثرات السنين يا حلالي يا مالي مبكره الفجر ع بلادنا من فوق قريتنا يبين يا حلالي يا مالي ما دام صاروا اطفالنا صخور القهر متسلقين) تغريبة زريف الطول شدة وتزول وترجع صبايا البلد ترخي للجدول ويعود حادينا يغني بليالينا ويرجع اليرغول يغني ع زريف الطول يا زريف الطول عيني يا زريف الغربة ما بتطول ويعود الوليف وينهد عنا بيت ويكسروا جرار الزيت وما نقول ياريت بنقول شدة وتزول ويرجع اليرغول يغني ع زريف الطول يا زريف الطول وارد على العين سالن دموعو على خدو سطرين ويحرقوا القمحات ويقطعوا الشجرات وسرقوا الميات ونقول شدة وتزول ويرجع اليرغول يغني ع زريف الطول يا زريف الطول يا عتاب الدار راحن القمحات ومن قلبي البذار ويتهدم الطابون ويقتلع الزيتون وتكثر هالسجون ونقول شدة وتزول ويرجع اليرغول يغني ع زريف الطول يا زريف الطول يا غصن الزيتون مثل أمي وأبوي علي حنون والدار تتكسر الحارة والمتجر ويكثروا العسكر ونقول شدة وتزول ويرجع اليرغول يغني ع زريف الطول يا زريف الطول نازل على السوق معبي للسلال تفاح وبرقوق ويمر الشهيد بزغروده وقصيد وتحبل النسوان بأجمل الصبيان وبموكب الأوطان نعدد الخيول ونقول شدة وتزول ويرجع اليرغول يغني ع زريف الطول يا زريف الطول إطلع ع الدرج من بعد هالشده راح يجي الفرح وإذا ابني راح عن بيتو وخرج ابن ابني راح يكمل مشوارنا صبر الطريق صبرنا صبر الطريق ع الماشي وهلنا دموع العين رشراش وصرنا نقطب قلبنا المجروح ونعيد بسمتنا بآخر روح وتكتب قصايد حب جياشة وقلنا يا ام الصبر ولي عاد الامل حامل معه فلي والسوسنة ببلادنا كبرت وعظامنا من الكسر انجبرت وما عاد فينا نخاف من واشي والهم عنا زال بأمر الله وعادت عروس الوطن تتجلى وتفرد جدايلها على الوادي وتقرا بعينيها صورة بلادي وتصيح يا أهل البلد شوباش يا حلالي يا مالي (يوميات عامل فلسطيني) يا حلالي يا مالي محدش داري بحالي عايش عمري يوم يوم وما بعرف وجه أطفالي طالع نازل نص الليل مضلش من حيلي حيل عم بركض ورا اللقمة حياتي مثل طراد الخيل باص يودي باص يجيب باص يوصل باص يغيب ومبكره زي امبارح والكل بينهش زي الذيب ومن الورشة للفرشة ومن الفرشة للورشة والزوادة شوية بيض أو حبة كوسا محشي وع باب المصنع يستنا الخواجة الي مشغلنا والمصنع كبير كبير بيسرق عمرنا منا هاللقمة مجبولة بدم والعيشة أحزان وهم ورغيف الخبز بزغر وكل سنة طفل بينضم مش عارف شو هالعيشة هي هي العريشة مثل ريشة بوسط الريح الله يساعد هالريشة مين يعاتب مين يلوم قضيت العمر مهموم بدي أرجع لارضي ثوب العيرة ما بدوم ويا حلالي يا مالي محدش داري بحالي رغم الآه رغم الآه اللي بعيونك ع شفافك زغريتيه رغم البحر اللي بجفونك ما نزلت قطرة ميه رغم الآه بقيتي يمه تشيلي اللوعات بكفه رغم الآه بقيتي يمه صدر كبير وحضن يدفي لوحيلي بمنديلك لوحي يلي شعرك ابيض واسود جروحك أقوى من جروحي وجفنك ع الدمعة ما تعود يلي زرعتي الحب الخالص من زغريتيه بحنيه وخليتي من الرمش الغايص بجفونك يحكي قضية ويلي جعلتي الطين الأحمر حنة يحني المرجة الخضرة بوداع المحبوب الأسمر كل الدنيا زريف وجفرا رجعنا يمه ايدك بايدي عم يسبقنا النور الطالع وسمعت بصدرك تنهيده دير بالك ع حجار الشارع وفتح عيونك يا بنيه زيتونة دقوا كعابها زيتونة ع التل دقوا كعابها قلعة أبية وشامخة ع ترابها بفياتها كل الأحبة تجمعوا وأغصانها للحب فتحت بابها وقدامها أهل الشهادة بيركعوا تايسجلوا تاريخهم ع خشابها وكرمالها كل المحبة بيزرعوا تاتظل من فوق الروابي مزيني بأسود ما كسروا الليالي نيابها طلع النهار عزفت وتار الفجر والليل طار وسمعت صوت الحنين بكل دار وتصايحوا ديوك الصبح وتجمعوا وفتحوا عيون الوفا وطلعوا ومن زوايا خيامنا طلع النهار ودار الزمن وتحركوا حجار الرحى وطفال عادوا يزينوا شمس الضحى ويجمعوا النجمات في عقد الوطن ويمسحوا الدمعات عن خد الزمن ويشيلوا عن وجه الوطن كمشة غبار وعاد الطفل للحب يغني يا زريف ويلبس عباية مقصبة ويمحي الخريف وعادوا شفافه بالفرح يتكلموا وعادوا عيونه للأمل يتقدموا من بعد ما ظنوا القمر شقفة رغيف ومن بعد ما ظنوا الوطن كومة حجار يسعد هالصباح من بسمة الفلاح من قلب الجراح شفت نور المجد في هالوطن لاح بايدوا بيحمل فاس وولادوا معو مثل النسر بيظل مفرود الجناح يا فلاحين بلادنا ظلوا ازرعوا بكل الروابي والبوادي والبطاح تاتحصدوا ثمار المحبة وتقلعوا وتزرعوا بالارض لبذور النجاح وفلاح أرض بلادنا من منبعوا بتلقى الرجولة والشهامة والسماح يبطل مثل الصبح ع بلادي وبقول: يا جنة الفردوس يسعد هالصباح هزي غربالك هزي غربالك هزي وطعمي الجاجة والوزة ومدي قمحات البيدر من الناقورة لغزة هزي القمحة المليانة من غماري وبستاني وإوع تخلي زوانه شدي الهمة واعتزي قمح البيدر هالأصفر مثل الذهب لمكرر كرمالو بدي أسهر تاتعيش الأرض بعزة ونادي إمي الختيارة وجيبي صبايا الحارة من حصاده وغماره ومن قبل الصبح فزي وشدي العصبه ع قبالي وحطي حمالك ع حمالي حالف لزت عقالي لو سبقتيني بهزه نسمة وطن بحبك يا نسمة وطن مليانة عبير حب البلابل للمياه وللشجر يا ناعمة وأنعم من ثياب الحرير يا صافية وأصفى من ألوان البحر بحبك قد ما الطير بجنحو يطير يا جبال فيها الحب والليل انأسر عم تسكريني بالجمال وبالعبير وعم تغمريني بلطف أحلى من الوتر لولاك... ما كان الشرق واعي وبَصير وما كانت الغيمات تلفي ع الوطن والأرض تفتح صدرها لحب المطر زهر الربيع زهر الربيع بأرضنا ثوبه جديد حامل بصدره طيب من دمع المطر كل ما تزهر وردته بيصير عيد بتغنى فيه الطير بليالي السحر نغمة الوادي مثل النغمات القصيد وصوت المناجل مثل خشخشة الوتر خايف ع زهر بلادنا يجي الحصيد ويصير يابس والورود مكسره ويقسى تراب بلادنا مثل الحجر هذا الوطن هذا الوطن صد الثنا لا تزعلوا ظلك بإكليل المحبة كللوا اللي وطنهم وطن ثاني بدلوا عاشوا بغربتهم أسى وتبهدلوا تارك أرضنا يالربع قالو ألو شدوا العزيمة وللقدوم اتعجلوا ما بنفع الإنسان يحيا بلا وطن لو يبني ع سطح الثريا منزلو بقلبي هموم تزيد صدري نار وتحرق رباب الشوق والأوتار البلوات عن تيجي ورا البلوات اصبر وصابر والحبل ع الجرار ============= قالوا ما إلك أرض ما عندك عتاب إنت خلقت... ريشة ع جنح الغراب قلتلهم هالحكي ما راح صدقوا لما بموت امنعوني ارجع تراب قوموا ارجعوا يا إخوتي ع ديرتي بعدوا وطنا مزهر وغصنوا فتي وإن كان غبتو لا تطولون الغياب خدي تعود ع اللطم يا حسرتي.... ============== حملت همي ع قدر جبل الدحي من ناس بهذا الزمن ما بتستحي في ناس ع الميه[2] بعلم اسمهم وفي ناس من لمسة غبار بتنمحي إحنا طيور بلادنا أحلامنا بْغُدر[3] مَيّتنا وبجنب صُفاصفنا ونِحنا زرعنا أرضنا ومرجه الخصيب وشِلنا هموم بلادنا عَ كتافنا ========== جُوّا السجن يا قاعد على الباب دُوخ ما رح تِرعبني باردوة أو صاروخ إنتوا حبستوا أجسامنا جُوّا السجون مافيش قوة بالدِّنِي تذل الشموخ بلادي لجرحي حبها أعظم دَوا ودوما لواها بالدِّنِي أعظم لِوا نِحنا بنُحصُد من هواها المرجلة وغيرنا عم يُحصدوا زَرع الهوى =========== يا بلادي غَنّي ويا مروجي إنبعي أشعار لبلاد الرجولة والوعي قالوا أترك بلادك وخذ جنّة عدن قُلتلهم ما بسيبها وروحي معي... يا راكبين خيولكم فوق السروج بعدوا ربيع بلادنا أخضر بموج الخيل لا تحلو يا ربعي أرْكَابها حتى نيران المظلمة تصبح ثلوج ============= فَتِّح ورودك.. هنا يا فصل الربيع ما عاد في عَنا أمل بَدّو يضيع نِحْنا انزَرعنا في الأرض مثل الزيتون سدّ انبَنا في وجه كل ظالم .. مَنيع لصيح بأعلى صوت يمّا.. ونادي غريب وغربتي من يوم ميلادي كل ما انهيت الدرب اتوزعتني دروب دمعي على خدّي وعيني على بلادي ============= بحكي معاكِ وعاملي ما بتسمعي قلبي انفجر... ما ظل في راسي وعي قَلَتْلي ع الجنة معك ما عاد روح قُلتِلها جاي وجايب جهنم معي صِرْتِ لَغيري بعد ما كنتِ إلي ما الحب إلا للحبيب الأولِ كبرنا على دنيا الهوى وهمومها وما عاد فيك تصغري وتتدلّلي ============== وَلَو.. وَلَو حتى من كلامي بتشكي كل ما بنادي.. ضحكتك دمع وبكي إيدك ع صدري إسمعي دق القلوب دقات قلبي مثل طبل المعركة نزل المطر وصخورنا فجرت نبوع وعادت حجار الموقدة تِضوي الشموع وعادت بلابل ديرتي تغني حِدا... تِعزف قصيد بلادنا ولحن الرجوع ============== قطعنا الجبل والسهل وأمواج البحر وغبنا سنين كثار في صدر القدر وعادت شمسنا بالجمال تزينّت تاترَجِّع الأنوار عا صدر القمر ما عاد إمي كحلها بمروادها بزغردوه حلوه ودّعت لولادها كل يوم في ع دروبها زفّة عريس صار الدمع سطرين فوق خدادها =============== ما كان بِدّي من المعاجز معجزة وما كان بدي شي عمارة مبروزة بدي أعيش.. بحضن ديرتنا الوفي خلّو المخيم... للقيامة مركزي شُفنا الدِّني ع قبالنا جيش ودرك وشفنا البحر قدامنا موج وشبك عدنا نهز عروشهم بزنودنا بيكفي حكي... إشبعنا من طق الحنك =============== صوت الطفولة ليش بدكم ينخرس وع المدرسة محطوط بارود وحرس ونُنْظم عتابا كل ما دق الجرس ظلينا ع الآمال نتعكّز وظل الوطن في قلوبنا مَبْروز وعدنا وقمنا وصار طفل اليوم بكَفو الصغير بيطعج المخرز ============== كِبر الورد ع دروبنا وكثروا لكبوش وصرنا نشيل بلادنا بشعر الرموش وظلت سنديانة على ظهر الجبل كل سنة تِطلق ميت[4] فرع من الشروش ================== ساق الله يوم كنا يا خي أطفال وشو طفولتنا هنية يوم العيد نسهرلوا ليالي تنحوش مصاري المرجيحة ================== تقدم يا ابن عمي تقدم على جهنم ترا خلفك جهنم أنا واياك عشنا بدون جنة سنين طوال جوات المخيم شروش الثقة بين الخليقة مقطعا وعنا بلاوي متلتله ومجمعا وصارت حياة الناس كلها بهدلة من الاربعا حتى تعود الاربعا ============= أنا واهلي ومن سكنو الخيامي آلام الناس مجموعة بآلامي تحملنا الظلم من يوم جينا وإلنا حساب بيوم القيامة..؟! كنت في ديرتي باني أبراجي أسود البر ما تقحم سياجي وياما ها الزمن ضيع أصلنا مصيبة لو نادوني الأهل لاجي[5]!! ================== حمام الدار ما أجمل هديلو مع طلوع الفجر حبَك اكليلو بيجيب الحب تا يطعمي طفالو ويرف جوانحو عشرين كيلو مخيمنا جمع أهلي وناسي بيوت كثار ما بدها حراسه تعلمنا وصار الكوخ معهد يعلم كل جاهل... بالسياسة =============== ع عظام رقابنا يا أفنديه قعدتوا ع الكراسي المخملية وصرت مالي هوية بكل مطرح غير مخيمي مالي هوية اضحكي يا جارة وغني يا امي كل يوم بيعملوا مؤتمر قمة أتاري قمة بلاد العروبة تحتا يسرقوا لقمة ثمي ================ مخيمجي أنا ربى أطفالو بابي زينكو بيوقع لحاله وسلطان الإذاعة والجريدة إبنك سويسرا مخزون مالو يا سنديانة بتذكري سنين المطر ونسمات نعسانه من أمواج البحر وكانت أجبالي اتنام إبحضن الشمس وليلاتنا تغفى على خد القمر ================ لا تسرقوا البسمة عن شفاف النجوم وتوضعوا حاجز على سفر القدوم وتجعلوا التاريخ طابع للبريد وتلبسوا لثوب عيري ما بدوم
